العيشة في مصر ولا العيشة في اوروبا احسن ؟؟ وجهتان نظر ولك الخيار

العيشة في مصر ولا العيشة في اوروبا احسن ؟؟ وجهتان نظر ولك الخيار

بغض النظر ان السؤال عام جدا وان فيه حيثيات كثير للرد علي السؤال ده .. بس انا هرد من وجهة نظري وتجبرتي الشخصيه ..

مصر مستوي الرفاهية فيها اعلي .. والناس الي معاها فلوس في مصر هتعرف تعيش عيشة اريح بكثير من عيشتها في اوروبا .. يعني مثلا لو في مصر معاك عربية بتدفع لها صيانه في السنه ٣ الاف جنيه .. فاوروبا لو معاك نفس العربية هتدفع لها صيانه علي الاقل ٢٠ الف جنيه و ضرايب ارقام خياليه .. ضرايب علي العربيه نفسها وroad taxes و هتدفع علشان العربية تركن في اي حته بالساعه و مجبر انك تعمل صيانة معينه قبل الكشف الدوري علشان العربيه تجتاز الكشف ورخصتها تتجدد و و و و و .. بينما في مصر بتشتري العربيه بليل .. تطلع رخصها الصبح وشكرا

نفس الفكرة في حاجات ثانيه .. في مصر بسهولة تقدر تجيب بنت تساعد زوجتك في شغل البيت وهتعرف تدفع تكلفة حاجه زي كده .. في الدنمارك مثلا علشان تجيب واحد/واحدة ينضفوا البيت او جزأ منه فاقل رقم ممكن تشوفه ١٠٠٠ جنيه في اليوم ... انا لما جيبت العفش بتاعي كنت محتاج اجمعه واركبه .. عادة في مصر هتجيب نجار يخلص لك الليله دي وهتعرف بسهولة تدفع تكلفة النجار ده .. هنا اخدت عرض من شركة علشان يبعتوا ليه نجار يركب ليه الدولاب وسرير اطفال ب١٢ الف جنيه التركيب بس ب١٢ الف جنيه .. علشان الراجل هيشتغل ٥ ساعات ياحرام ..

التاكسي مثلا في مصر يوم ماهتجيب البلد من اولها لاخرها هتدفع ١٠٠ جنيه وده بزيادة كمان .. هنا هتدفع بالميت ٤٠٠ جنيه وبسهولة الرقم ده بيوصل للضعف تقريبا لو فيه زحمة او المسافة طولت شويه .. في محطات البنزين مثلا مفيش حد يملي لك البنزين علشان بنسبة كبيره مرتبه هيبقي ٢٠ الف جنيه

في المطار مثلا مفيش حد يشيل لك شنطك علشان نفس الفكرة .. مرتبه هيبقي خيالي .. في السوبر ماركت الراجل الي قاعد علي الكاشير مش هيعبر فيك ويساعدك علشان تحط حاجاتك في اكياس .. لانه من طبقه اوروستقراطيه ودوره بينحصر انه يقولك هتدفع كام وبس .. الاكل بره البيت مش محتاج اتكلم علي تكلفته .. يعني بسهولة ممكن تدفع في مطعم ٦٠٠ جنيه .. علشان ببساطه العمال في المطعم ده بياخدوا ارقام كبيرة

ملحوظتي انا وزوجتي بعد ٣ شهور اقامة في البلد بشكل نشيط .. ان حياتنا هنا اصعب من حياتنا في مصر في مصر كنا في رفاهية اكثر .. في مصر كان ينفع تاجر Yacht وتقضي يومك في العين السخنه مثلا ومش هتتكلف ١٠٠٠ جنيه .. هنا في اوروبا حاجه زي كده .. تقريبا حلم هتحققه في اخر ايام حياتك

مش محتاج اقول .. انك بتدفع ضرايب علي دخلك توصل ل٥٠٪ .. ضرايب علي وجود تليفزيون او سمارت فون في بيتك .. ضرايب علي استخدامك الطريق .. ضرايب علي كل السلع الي بتشتريها .. ضرايب علي عربيتك .. ضرايب علي بيتك .. انت لو ليك مصدر دخل في مصر .. هتدفع ضرايبه في اوروبا لمجرد انك مقيم في دولة اوروبيه ..

اما العيش في اوروبا مع ان الدنيا صعبه كده ؟؟

في اوروبا فيه امن وامان وحريات صعب تلاقيها في اوطاننا العربيه المسلمه .. في اوروبا فيه كرامة للانسان و تقدير للنفس البشرية .. فيه حسن الظن بالمواطن .. يعني بسهولة جدا لو عملت حاجه غلط مخالفه للقانون وكان واضح انك عملتها بدون قصد مفيش حاجه اسمها القانون لا يحمي المغفلين .. القانون وضع ليحمي كل الناس بما فيهم المغفلين والحكومه هتقدر جهلك و تسامحك .. علي سبيل المثال لو اتمسكت راكب قطر او مترو بدون ماتدفع تذكرة فيكفي انك تثبت انك جديد في البلد وانك تجهل بالقوانين وانك جاهل بنوع التذاكر واي نوع المفروض تحجزه .. ليتم تقديم خدمة تعريفك علي النظام كامل و بيسامحوك عادي مع انك كنت مخالف القانون ..

في اوروبا معظم الشعب مش بيحوش لولاده .. يعني مش محتاج يامن مستقبل عياله .. هو محتاج يعيش هو حياة كريمة وبس .. ولادك الحكومة هتعلمهم و تحافظ علي صحتهم و هتدعمهم ماديا اول مايتخرجوا وحتي وهم في الجامعه و هتساعدهم يتعلموا تعليم يجيب لهم شغل بعد مايخلصوا .. وهتديهم قروض علشان يعرفوا يبدأوا حياتهم ..

في اوروبا فيه عدالة اجتماعية .. يعني مفيش موظف بيقبض ١٠٠ ضعف موظف ثاني .. يعني لو قعدت تترقي ومرتبك يزيد .. هتلاقي الضرايب بتزيد معاك و تقريبا الشعب كله هيبقي بيقبض مرتبات في شريحة معينه .. لك ان تتخيل ان ٩٠٪ من الشعب الدنماركي لو مش اكثر كمان معندهمش ٥٠ الف جنيه في حسابهم في البنك وبنسبة كبيرة عليهم قروض وديون للبنوك ..

في اوروبا الاطفال عندهم ٤ سنوات وبيلعبوا في الشارع بدون صحبة اهلهم .. في اوروبا الست بتدخل السوبر ماركت وهي سايبه عربية ابنها او بنتها رضيع بره السوبر ماركت وهي عارفه انها هتطلع تلاقيه

في اوروبا فيه شبكة مواصلات بتراعي ادمية الانسان .. وفيه خدمات حكومية بتخلص لك مصالحك بمكالمة تليفون .. فيه نظام بريدي بيسمح لاي شركة او فرد او هيئه انها تبعتلك اي حاجه علي البيت سواء جواب او حاجه مشتريها خلال ٣ ايام عمل من اي حتة في اي دولة اوروبيه كحد اقصي .. وبتكلفة شبه منعدمه .. فسهل تصحي الاثنين الصبح تعمل اوردر لحاجه تلاقيها عندك يوم الاربعاء مثلا .. سهل الحكومة تراسلك تطلب منك حاجه وسهل انك ترد عليها .. ده في دول زي الدنمارك فيه نظام مراسلات الكتروني مخصوص للتعامل مع الحكومة و الشركات .. بيجيلك عليه البريد ..

في اوروبا الحكومة بتفترض فيك حسن النية حتي ثبت العكس ولو ثبت العكس هتروح ورا الشمس يعني مثلا ممكن الحكومة تقولك ادخل علي الموقع ده وقول المفروض تدفع ضرايب كام طبقا لدخلك .. وانت الي بتقول الضرايب الي هتدفعها كام .. لو في مره موظف من الضرايب اكتشف انك متلاعب في ضرايبك .. هتروح ورا الشمس .. بس الاصل ان الحكومة الي بتقولك احسب ضرايبك وقولنا هتدفع كام

خلاصة الكلام ده .. مصر حلوه لو عاوز تعيش زي الانعام .. بتاكل وتشرب و تقضيها من شرقها لغربها ومش فارق معاك المجتمع الي عايش فيه ولا حالة الناس الثانيه الي عايشه معاك في نفس البلد .. هتبقي حلوه اوي وانت بتدفع تراب الفلوس في فسحة للغردقه ولا شرم الشيخ او العين السخنه .. وهتبقي احلي بالتكلفة الزهيدة لمحلات الاكل في مصر و السينمات والخروجات .. واحلي واحلي وانت سايق عربيتك الي بتكلفك ارخص بنزين في العالم و اقل صيانة ..

بس لو فكرت في مره تشوف اي حد بتعالج في مستشفي حكومي .. لو فكرت ال٩٥٪ من بقية الشعب هيروحوا فين و هيعيشوا ازاي .. لو فكرت في مره تعبر عن رايك بحرية .. لو فكرت في مره تشتغل في مكان بتحبه و يكون لك فيه راي مسموع .. لو فكرت ازاي هتعلم بنتك او ابنك في مصر وهتعلمهم ايه ؟؟ المناهج المصريه ؟؟ ولا هتدخلهم المدارس الاجنبيه الي معظمها نفسيات مريضه متخيله اننا كل مانبعد عن الدين الدنيا هتبقي كووول اكثر ؟؟ لو فكرت ازاي تشتغل في مكان مش خايف فيه من بكرة ومش خايف من مديرك المتسلط .. لو فكرت انك تلاقي الناس كلها حوليك بتضحك وبشوشه من اول سواق النقل العام لحد مدير الشركة .. الناس كلها فرحانه وعايشه حياتها وعايشه تقريبا في نفس المستوي من اساسيات الحياة .. من اول عامل النظافه لحد رئيس مجلس الاداره ..